ఈ రోజుల్లో ఫ్యాటీ లివర్ సమస్య కేసులు పెరుగుతున్నాయి.ఫ్యాటీ లివర్‌తో పాటు లివర్ సిర్రోసిస్, లివర్ ఇన్‌ఫెక్షన్, లివర్ ఫెయిల్యూర్ మొదలైన వాటి ప్రమాదం పెరుగుతుంది. అందుకే కాలేయాన్ని ఆరోగ్యంగా ఉంచుకోవాలంటే కొన్ని మార్పులు చేసుకోవాలి.
రోజూ వేగంగా నడవండి..
వైద్యుల ప్రకారం బ్రిస్క్ వాకింగ్ కాలేయ ఆరోగ్యాన్ని మెరుగుపర్చడానికి చాలా ప్రభావంతంగా పనిచేస్తుంది. బ్రిస్క్ వాకింగ్ వల్ల గుండె కొట్టుకునే వేగం పెరిగి కాలేయంలో కొవ్వు కరుగుతుందని వైద్యులు చెబుతున్నారు. ఫ్యాటీ లివర్ వ్యాధితో బాధపడేవారికి ఇది బెస్ట్ వ్యాయామం. ప్రతి రోజూ 20 నుంచి 30 నిమిషాల పాటు నడవడం అలవాటు చేసుకోవాలని అధ్యయనాలు చెబుతున్నాయి. ప్రతి కి.మీకి నడకలో వేగం పెంచితే ఫలితం అద్భుతంగా ఉంటుందని అధ్యయనాలు చెబుతున్నాయి.
సైక్లింగ్..
క్రమం తప్పకుండా సైకిల్ తొక్కడం శరీరానికి మంచిదని భావిస్తారు. ఇది గుండె చుట్టూ కొవ్వు పేరుకుపోకుండా నిరోధించడమే కాకుండా కండరాలను బలపరుస్తుంది. ప్రతిరోజూ ఉదయం సైకిల్ తొక్కడం వల్ల తొడ కండరాలు బలపడతాయి. స్వచ్ఛమైన గాలి కూడా మీకు అందుతుంది. అంతేకాకుండా కాలేయం చుట్టూ పేరుకుపోయిన కొవ్వు తగ్గుతుంది.
స్విమ్మింగ్..
స్విమ్మింగ్ అనేది చాలా మంచి వ్యాయామం. ఇది శరీరానికి ఎంతో మేలు చేస్తుంది. ఈ వ్యాయామంతో ఫ్యాటీ లివర్ సమస్యను చాలా వరకు తగ్గించుకోవచ్చు. కొన్ని రోజుల పాటు క్రమం తప్పుకుండా స్విమ్మింగ్ ప్రాక్టీస్ చేయడం వల్ల గుండె కండరాలు బలపడతాయి. అంతేకాకుండా జీవక్రియ వేగవంతం అవుతుంది. దీంతో.. ఎలాంటి సమస్యలు లేకుండా ఆరోగ్యంగా ఉండవచ్చు.
లైఫ్‌స్టైల్‌లో ఈ మార్పులు చేసుకుంటే కాలేయం సేఫ్..
చక్కెరకు దూరంగా ఉండండి..అధిక చక్కెర వినియోగం శరీరంతో పాటు కాలేయానికి హానికరం. అధిక చక్కెర వినియోగం వల్ల ఫ్యాటీ లివర్ సమస్య వస్తుంది. ఈ సమస్యకు చెక్ పెట్టాలంటే చక్కెరకు దూరంగా ఉండాలి. కేకులు, పేస్ట్రీలు, ఐస్ క్రీమ్‌లు వంటి బరువును పెంచే ఆహారాలకు దూరంగా ఉండండి. వీటిని తినడం వల్ల కాలేయంతో పాడు గుండెకు కూడా హాని కలుగుతుంది. అందుకే చక్కెర వినియోగాన్ని పరిమితం చేయండి.
ఆకుకూరలు భాగం చేసుకోండి..
లివర్ ఆరోగ్యంగా ఉండాలంటే వేయించిన ఆహారాలు, స్పైసీ ఫుడ్స్‌కి దూరంగా ఉండాలి. మీ ఆహారంలో ఆకుకూరల్ని భాగం చేసుకోండి. ఎందుకంటే వేయించిన ఆహారాన్ని ఎక్కువగా తినడం వల్ల కేలరీల తీసుకోవడం పెరుగుతుంది. ఇది ఊబకాయానికి దారితీస్తుంది. దీని వల్ల ఫ్యాటీ లివర్ సమస్యలు వస్తాయి. అదే ఆకుకూరల్లో పోషకాలు మెండుగా ఉంటాయి. ఇవి కాలేయం నుంచి టాక్సిన్లను బయటకు పంపడంలో సాయపడతాయి.
ఒమేగా-3 ఫ్యాటీ యాసిడ్స్..
ఆహారంలో చేపలు, విత్తనాలు, మొక్కల నూనెలు, సోయాబీన్ నూనె వంటి ఒమేగా 3 రిచ్ ఫుడ్‌లను చేర్చుకోండి. వీటిని తినడం వల్ల కాలేయం చుట్టూ పేరుకుపోయిన కొవ్వు ఇట్టే కరిగిపోతుంది.
తగినంత నిద్ర..
ఓ వ్యక్తి ఆరోగ్యంగా ఉండాలంటే సమతుల్య ఆహారంతో పాటు తగినంత నిద్ర కూడా చాలా అవసరం. రోజూ కనీసం 7 నుండి 8 గంటల నిద్ర మనిషికి అవసరం. ఎందుకంటే తగినంత నిద్ర కాలేయ వ్యాధి ప్రమాదాన్ని తగ్గిస్తుంది. తక్కువ నిద్రపోవడం వల్ల కాలేయం ఎక్కువ ప్రభావం చెందుతుంది.
